ಎಮೋಷನಲ್ ಅತ್ಯಾಚಾರ

ಯಾರದ್ದೇ ಪರ್ಸನಾಲಿಟಿ ತನ್ನಷ್ಟಕ್ಕೆ ತಾನು ಪೂರ್ಣ ಅನ್ನಿಸಿಕೊಳ್ಳಬೇಕಾದರೆ ಅವರಿಗೆ ಅವರದ್ದೇ ಆದ ಒಂದು ಸ್ಪೇಸ್ ಇರಬೇಕು. ಅವರವರ ಖಾಸಗಿ ಭಾವನೆಗಳಿಗೆ, ಅನ್ನಿಸಿಕೆಗಳನ್ನ ಗುಟ್ಟಾಗಿಟ್ಟುಕೊಳ್ಳಲು, ತಮ್ಮ ಬಯಕೆಗಳನ್ನ ಮನದಟ್ಟು ಮಾಡಿಕೊಂಡು ಅದರಂತೆ ಯೋಜನೆ ಹಾಕಿಕೊಳ್ಳಲು- ಇಂಥವಕ್ಕೆಲ್ಲ ಒಂದು ಪ್ರೈವೇಟ್ ರೂಮ್‌ನಂಥ ಜಾಗ ವ್ಯಕ್ತಿತ್ವದೊಳಗೆ ಸಹಜವಾಗಿ ಇರಬೇಕು. ಆದರೆ ಎಲ್ಲರಿಗೂ ಇಂತಹ ಅವಕಾಶ ದೊರಕುವುದು ಕಷ್ಟ. ಅದರಲ್ಲೂ ಹೆಚ್ಚಿನಂಶ ಹೆಣ್ಣುಗಳಿಗೆ ಇಂಥ ಖಾಸಗಿ ಕೋಣೆ ಕನಸಿನ ಮಾತೇ ಸರಿ. ಅವರ ಹೊರವಲಯದ ಬದುಕಲ್ಲಿ ಹೇಗೋ ಹಾಗೇ ಒಳಗಿನ ಬದುಕಲ್ಲೂ ಅತಿಕ್ರಮ ಪ್ರವೇಶ ಮಾಡುವವರು ಇರುತ್ತಾರೆ. ಹೀಗೆ ನುಗ್ಗುವವರು ಗಂಡಸರೇ ಆಗಬೇಕೆಂದಿಲ್ಲ. ಸ್ವತಃ ಸ್ಪೇಸ್ ಕಳಕೊಂಡಿರುವ ಹೆಣ್ಣುಗಳು ಕೂಡ ಇದನ್ನು ಮಾಡಬಹುದು.
ಹೀಗೆ ಭಾವುಕ ಜಗತ್ತಿನೊಳಗೆ ಅತಿಕ್ರಮವಾಗಿ ಬಂದು ಹರ್ಟ್ ಮಾಡುವುದನ್ನು ಎಮೋಶನಲ್ ರೇಪ್ ಅಥವಾ ಭಾವುಕ ಅತ್ಯಾಚಾರ ಎನ್ನಲಾಗುತ್ತದೆ. ಇದು, ವ್ಯಕ್ತಿಯೊಬ್ಬನನ್ನು ವ್ಯವಸ್ಥಿತವಾಗಿ ಇಲ್ಲವಾಗಿಸುವ ಸಂಚು. ಯಾರನ್ನಾದರೂ ಭಾವನಾತ್ಮಕವಾಗಿ ಮುಗಿಸಿಹಾಕಲು ಇರುವ ಅತ್ಯಂತ ಅಮಾನವೀಯ ದಾರಿ, ಅವರನ್ನು ಕಡೆಗಣಿಸುವುದು, ಅವರಿಗೊಂದು ಅಸ್ತಿತ್ವವೇ ಇಲ್ಲವೆಂಬಂತೆ ನಡೆಸಿಕೊಳ್ಳುವುದು, ಈ ಮೂಲಕ ಅವರೊಳಗೆ ಕೀಳರಿಮೆ ಮೂಡಿಸಿ ಅವರ ಸ್ಪಿರಿಟ್ ಅನ್ನೇ ಕಸಿದುಕೊಳ್ಳುವುದು. ವಾಸ್ತವವಾಗಿ ಇದು ದೇಹದ ಮೇಲಿನ ಅತ್ಯಾಚಾರಕ್ಕಿಂತ ಕ್ರೂರವಾದುದು.
ದೈಹಿಕ ಅತ್ಯಾಚಾರ ಆದಾಗ ಅಲ್ಲಿ ಮುಖ್ಯವಾಗಿ ರೇಪಿಸ್ಟ್‌ನ ದೈಹಿಕ ವಿಕೃತಿ ಕೆಲಸ ಮಾಡಿರುತ್ತದೆ. ಅದಕ್ಕೆ ಒಳಗಾದ ಹೆಣ್ಣು ಕೂಡ ದೇಹದ- ಕಣ್ಣಿಗೆ ಕಾಣುವಂಥ ಯಾತನೆ ಮತ್ತು ಇನ್ಸಲ್ಟ್ ಅನುಭವಿಸಿರುತ್ತಾಳೆ. ಇಂಥಲ್ಲಿ ರೇಪಿಸ್ಟ್‌ನ ದೇಹದೊಟ್ಟಿಗೆ ಅವನ ಅಹಂಕಾರ, ಡಾಮಿನೇಟಿಂಗ್ ಮನೋಭಾವಗಳು ಕೂಡ ತೃಪ್ತಿಗೊಳ್ಳುತ್ತವೆ. ಎಮೋಶನಲ್ ಅತ್ಯಾಚಾರದಲ್ಲಿ ದೇಹತೃಪ್ತಿಯ ಪಾತ್ರವೇ ಇಲ್ಲ. ಇದನ್ನು ನಡೆಸುವವರ ಮುಖ್ಯ ಉದ್ದೇಶ ಕೇವಲ ಮನಸ್ಸನ್ನು ಹರ್ಟ್ ಮಾಡುವುದು ಇಲ್ಲವೇ ಮುದುಡಿಸುವುದು. ಎರಡಕ್ಕೂ ಇರುವ ಸಮಾನ ಅಂಶವೆಂದರೆ, ಇಲ್ಲಿ ಕೂಡ ರೇಪಿಸ್ಟ್‌ನ ಅಹಂಕಾರ ಮತ್ತು ಅಂಕೆಯಲ್ಲಿಟ್ಟುಕೊಳ್ಳಬೇಕೆನ್ನುವ ಹುನ್ನಾರ ತೃಪ್ತಗೊಳ್ಳುತ್ತದೆ ಅನ್ನೋದು. ದೇಹದ ವಿಷಯದಲ್ಲಿ ಅತ್ಯಾಚಾರವೆಂದರೆ, ಸಹಮತವಿಲ್ಲದೆ ಅದನ್ನು ದುರ್ಬಳಕೆ ಮಾಡಿಕೊಳ್ಳುವುದು ಎಂದಾಗುತ್ತದೆ. ಮನಸ್ಸಿನ ವಿಚಾರಕ್ಕೆ ಬಂದಾಗಲೂ ಸಹಮತವಿಲ್ಲದೆ ಖಾಸಗಿ ಭಾವನೆಗಳನ್ನು, ಮತ್ತೊಬ್ಬರೆಡೆಗಿನ ಉನ್ನತ ಪ್ರೇಮವನ್ನು, ಮೌಲ್ಯಗಳನ್ನು ದುರ್ಬಳಕೆ ಮಾಡಿಕೊಂಡು ಕೆಡಿಸುವುದು ಎಂದು ಡಿಫೈನ್ ಮಾಡಲಾಗಿದೆ.
ಹೆಣ್ಣುಮಕ್ಕಳು ಮನೆಯಲ್ಲಿ, ಸ್ಕೂಲ್, ಕಾಲೇಜ್, ಆಫೀಸ್‌ಗಳಲ್ಲಿ ಅಥವಾ ಯಾವುದೇ ಕೆಲಸದ ಜಾಗದಲ್ಲಿ ಎಮೋಶನಲ್ ಅತ್ಯಾಚಾರಕ್ಕೆ ಒಳಗಾಗಬಹುದು. ಮನೆಯಲ್ಲೇ ಇದರ ಮೊದಲ ಅನುಭವ ಆಗಿಬಿಡುವುದರಿಂದ, ಅದರ ಜೊತೆಗೆ ಹೊಂದಿಕೊಂಡು ಹೋಗುವವರೇ ಹೆಚ್ಚು. ದುರಂತವೆಂದರೆ, ಬಹಳಷ್ಟು ಹೆಣ್ಣುಮಕ್ಕಳಿಗೆ ತಮ್ಮ ಜೀವಮಾನವಿಡೀ ಹೀಗೆ ತಮ್ಮ ಖಾಸಗಿತನವು ಆಕ್ರಮಿಸಲ್ಪಟ್ಟಿದ್ದು ಗೊತ್ತೇ ಆಗಿರೋದಿಲ್ಲ.

ಮನೆಯಲ್ಲೇ ಮೊದಲು
ಯಾರನ್ನಾದರೂ ತಮ್ಮ ಅಂಕೆಗೆ ತೆಗೆದ್ಕೊಳ್ಳಬೇಕಂದರೆ, ಅವರಲ್ಲಿ ಗಿಲ್ಟಿ ಫೀಲಿಂಗ್ ಮೂಡಿಸುವುದು ಒಂದು ಸರಳ ವಿಧಾನ. ಹೆಣ್ಣುಮಕ್ಕಳು ಅಂಕೆಯಲ್ಲಿದ್ದರೆ ಸಂಸಾರ ಸಲೀಸಾಗಿ ನಡೆಯುತ್ತದೆ ಎನ್ನುವ ಪುರಾತನ ನಂಬಿಕೆಯು ಅವರ ಮೇಲೆ ಅನಗತ್ಯವಾಗಿ ತಪ್ಪುಗಳ ಹೊರೆ ಹೊರಿಸುತ್ತಾ ಸಾಗುತ್ತದೆ. ಮನೆಯಲ್ಲಿ ಹೊಂದಿಕೊಂಡು ಹೋಗಬೇಕೆನ್ನುವ ಮೊದಲ ಪಾಠ ಒಳಿತಿನ ದೃಷ್ಟಿಯಿಂದ ಎಷ್ಟೋ ಹೆಚ್ಚೂಕಡಿಮೆ ಅಷ್ಟೇ ಪ್ರಮಾಣದ ತಾರತಮ್ಯ ದೃಷ್ಟಿಯನ್ನೂ ಹೊಂದಿರುತ್ತದೆ. ತಾನು ಕೂಡ ಇಂಥ ಅತ್ಯಾಚಾರಗಳನ್ನು ಹಾದುಬಂದ ಅಮ್ಮನೆ ಮಗಳ ಇಷ್ಟಗಳನ್ನು ಚಿವುಟುತ್ತ, ಘಾಸಿ ಮಾಡುತ್ತ ನಡೆಯುತ್ತಾಳೆ. ಅಳು, ಬೇಡಿಕೊಳ್ಳುವಿಕೆ, ಬಯ್ಗುಳಗಳು, ಶಿಕ್ಷೆ ಇವೆಲ್ಲ ಕಾಲಕ್ರಮದಲ್ಲಿ ಹೂಡಿಕೊಳ್ಳುತ್ತಾ ಆ ಹೆಣ್ಣುಮಗಳಲ್ಲಿ ನ್ಯಾಚುರಲ್ ಆಗಿ ಅರಳಿಕೊಂಡಿರುವ ಜೀವಂತಿಕೆಯನ್ನು ಮುದುಡಿಸುತ್ತ ಸಾಗುತ್ತವೆ.
ಮನೆಯಲ್ಲಿ ಇದರ ಮೊದಲ ಪರಿಚಯ ಆಗುವಂತೆಯೇ ಇದನ್ನು ಮುಚ್ಚಿಟ್ಟುಕೊಳ್ಳುವ ರೂಢಿಯೂ ಮೊದಲಾಗುತ್ತದೆ. ತಮ್ಮ ಖಾಸಗಿತನದೊಳಕ್ಕೆ ಯಾರೇ ಬಂದರೂ ಅದೊಂದು ಆಕ್ಷೇಪಾರ್ಹ ಸಂಗತಿ ಎಂದು ಕನ್ಸಿಡರ್ ಮಾಡುವುದೇ ಇಲ್ಲ. ಪ್ರತಿಕ್ರಿಯೆ ಬರುವುದಿಲ್ಲ ಎನ್ನುವುದು ಖಾತ್ರಿಯಾದಾಗ, ಸ್ಪಂದನೆಯ ಬದಲಿಗೆ ವ್ಯಂಗ್ಯ ಮತ್ತು ಅನುಸರಿಸಿಕೊಂಡು ಹೋಗೆನ್ನುವ ಬುದ್ಧಿವಾದವೇ ದೊರೆಯುತ್ತದೆ ಎಂದು ಗೊತ್ತಾದಾಗ `ಸುಮ್ಮನಿದ್ದುಬಿಡುವುದೇ ಸುಖ’ ಎನ್ನಿಸತೊಡಗುತ್ತದೆ.
ಮನಶ್ಶಾಸ್ತ್ರಜ್ಞ  ರಿಚರ್ಡ್ ಡ್ರೇಫಸ್ ಹೇಳುವ ಹಾಗೆ, `ಎಮೋಶನಲ್ ರೇಪ್‌ಗೆ ಒಳಗಾದವರು ಅತ್ಯುತ್ತಮ ನಟರಾಗಿ ರೂಪುಗೊಳ್ಳುತ್ತಾರೆ.ಯಾಕೆಂದರೆ, ತಮ್ಮದಲ್ಲದ ಯೋಚನೆಗಳನ್ನು ಅವರು ಇಷ್ಟಪಡಬೇಕಿರುತ್ತದೆ. ತಮ್ಮ ಇಡಿಯ ಜೀವನವನ್ನ ಅವರು ತಮಗಾಗಿರುವ ಭಾವನಾತ್ಮಕ ಆಘಾತ ಹಾಗೂ ನೋವುಗಳನ್ನು ಮುಚ್ಚಿಟ್ಟುಕೊಳ್ಳುತ್ತಾ ಏನೂ ಸಮಸ್ಯೆಯಾಗಿಲ್ಲ ಎನ್ನುವಂತೆ ಪೋಸ್ ಕೊಡುತ್ತಾ ಕಳೆಯಬೇಕಿರುತ್ತದೆ.’ ಒಳಗೆ ಚಡಪಡಿಕೆ ಇಟ್ಟುಕೊಂಡು ಹೊರಗೆ ತಣ್ಣಗೆ ತೋರಿಸಿಕೊಳ್ಳುವುದು ಜಗತ್ತಿನ ಶ್ರೇಷ್ಟ ನಟನೆಯಂತೆ. ನಿಜ ಬದುಕಿನಲ್ಲಿ ಗಂಡಿಗಿಂತ ಹೆಣ್ಣು  ಹೆಚ್ಚು ಚೆನ್ನಾಗಿ ನಟಿಸುತ್ತಾಳಂತೆ. ಇದನ್ನು ನಮಗೇನೇ ಬಹಳಷ್ಟು ಬಾರಿ  ನಟಿಸಿ ಗೊತ್ತುಮಾಡಿಕೊಂಡಿದ್ದೇವಲ್ಲವೆ?

ವೈವಿಧ್ಯತೆ ಇದೆ!
ಹೆಣ್ಣುಮಕ್ಕಳನ್ನ ಭಾವುಕವಾಗಿ ಎಕ್ಸ್‌ಪ್ಲಾಯ್ಟ್ ಮಾಡೋದು ಬಹಳ ಸುಲಭ. ಮನೋವಿಜ್ಞಾನ ಹೆಣ್ಣಿನ ಮನಸ್ಸನ್ನು ಬಿಚ್ಚಿಡುತ್ತಾ, ಅದರ ಸೂಕ್ಷ್ಮತೆ, ಸ್ಪಂದನೆ ಮತ್ತು ಆಸಕ್ತಿಗಳನ್ನು ಅನಲೈಸ್ ಮಾಡಿ ಈ ಮಾತನ್ನು ಹೇಳಿದೆ. ಗಂಡಸರಿಗಿಂತ ಹೆಚ್ಚು ರಂಜನೀಯ ಬದುಕು ಮತ್ತು ಸಾಧ್ಯತೆಗಳನ್ನು ಹೊಂದಿರುವ ಹೆಣ್ಣುಗಳು ಹರ್ಟ್ ಆಗಲು ಕೂಡ ಅಷ್ಟೇ ವೈವಿಧ್ಯಮಯ ಆಯ್ಕೆಗಳಿವೆ.
ಮನೆಯ ವಾತಾವರಣವು ಸಾಮಾಜಿಕ ರೀತಿರಿವಾಜಿಗೆ ಒಳಪಡುವ ಪಾರಂಪರಿಕ ಕಾರಣಗಳಿಂದಾಗಿ ಪರಸ್ಪರ ಅರಿವಿಲ್ಲದೆ ನಿರಂತರ ಭಾವುಕ ಅತ್ಯಾಚಾರದ ತಾಣವಾಗಿ ರೂಪುಗೊಂಡಿರುತ್ತದೆ. ಇಲ್ಲಿದು ಅರಿವಿನ ಹೊರತಾಗಿ ನಡೆಯುವ ಪ್ರಕ್ರಿಯೆಯಾದ್ದರಿಂದ ಪರಿಹಾರ ಹುಡುಕುವುದು ಕಷ್ಟ. ಏಕೆಂದರೆ ಇಲ್ಲಿಯ ಎಮೋಶನಲ್ ರೆಪಿಸ್ಟ್‌ಗಳು ಹಾನಿ ಮಾಡಲೇಬೇಕೆನ್ನುವ ದುರುದ್ದೇಶ ಹೊಂದಿರುವುದಿಲ್ಲ.
ಹೊರಗಿನ ಬದುಕಿಗೆ ಬಂದಾಗ, ದೇಹದ ನಿಲುವು, ರೂಪ, ಬಟ್ಟೆಬರೆ, ಆಯ್ಕೆಗಳು ಇವೆಲ್ಲವೂ ಮಾತಿನ- ನೋಟದ ಲೂಟಿಗೊಳಗಾಗುತ್ತ ಸಾಗುತ್ತವೆ. ಇಲ್ಲಿ ಗಾಸಿಪಿಂಗ್, ಮುಖ್ಯ ಆಯುಧವಾಗಿ ಬಳಸಲ್ಪಡುತ್ತದೆ. ಹೆಣ್ಣುಮಕ್ಕಳ ಲವ್ ಅಫೇರ್‌ಗಳನ್ನು ಕಲ್ಪಿಸಿಕೊಂಡು ಅದನ್ನೇ ಸುದ್ದಿಯಾಗಿಸುವುದು, ನಡತೆಯ ಬಗ್ಗೆ ತಪ್ಪು ಅಭಿಪ್ರಾಯಗಳನ್ನು ಮೂಡಿಸುವುದು, ಅನಾನಿಮಸ್ ಆಗಿ ಪತ್ರಗಳನ್ನು ಬರೆಯುವುದು, ಸುಳ್ಳು ಪ್ರೀತಿ ನಟಿಸುತ್ತ ಅವರ ವಿಷಯಗಳನ್ನು ತಿಳಿದುಕೊಂಡು ಅನಂತರ ಬ್ಲಾಕ್‌ಮೇಲ್ ಮಾಡುವುದು- ಇವೆಲ್ಲ ಕೈಮೀರಿದ ಹಂತದಲ್ಲಿ ಜೀವವನ್ನೇ ತೆಗೆದುಕೊಳ್ಳಬಹುದಾದ ಅತ್ಯಾಚಾರಗಳು. ಯಾವುದೆ ದೇಶದ ಕಾನೂನು ಕೂಡ ಈವರೆಗೆ ಇಂಥ ಎಮೋಶನಲ್ ಅತ್ಯಾಚಾರಗಳಿಗೆ ಕಠಿಣ ಶಿಕ್ಷೆ ವಿಸಿಲ್ಲ. ಇಂಥವನ್ನು ‘ಕ್ರೈಮ್’ ಎಂದು ಪರಿಗಣಿಸತೊಡಗಿದ್ದೇ ಇತ್ತೀಚಿನ ದಶಕಗಳಲ್ಲಿ.
ಎಮೋಶನಲ್ ರೇಪ್‌ನ ಆಘಾತದಿಂದ ಹೊರಬರುವುದು ಕಷ್ಟಸಾಧ್ಯ ಎನ್ನಿಸುವ ಪ್ರಕ್ರಿಯೆ. ಏಕೆಂದರೆ ಇಲ್ಲಿ ಆಗಿರುವ ನಷ್ಟಗಳು ಕಣ್ಣಿಗೆ ಕಾಣುವಂಥದ್ದಲ್ಲ, ಯಾವುದೇ ಪರೀಕ್ಷೆಯಿಂದ ಖಚಿತ ಮಾಡಿಕೊಳ್ಳುವಂಥದ್ದಲ್ಲ. ಎಷ್ಟೋ ಬಾರಿ ಅದಕ್ಕೆ ಒಳಗಾದವರಿಗೇ ಅದರ ಅರಿವಿರುವುದಿಲ್ಲ. ಅಲ್ಲದೆ, ಇದು ಒಮ್ಮಿಂದೊಮ್ಮೆಗೆ ಎಸಗಬಹುದಾದ ಅತ್ಯಾಚಾರವಲ್ಲ. ವಿವಿಧ ಸನ್ನಿವೇಶಗಳಲ್ಲಿ, ಬಹಳ ಸ್ಕಿಲ್‌ಫುಲ್ ಆಗಿ ಇದನ್ನು ನಡೆಸಲಾಗುತ್ತದೆ. ಆದ್ದರಿಂದಲೇ ಇದರ ಪರಿಣಾಮ ಹೆಣ್ಣಿನ ವ್ಯಕ್ತಿತ್ವದೊಳಗೆ ವ್ಯಾಪಿಸಿಕೊಳ್ಳುತ್ತಾ ಅವಳ ಸ್ಪೇಸ್ ಅನ್ನು ನುಂಗುತ್ತಾ, ಅವಳ ಪರ್ಸನಾಲಿಟಿಯನ್ನು ಇಲ್ಲವಾಗಿಸುತ್ತಾ ಸಾಗುತ್ತದೆ. ಎಮೋಶನಲ್ ರೇಪ್‌ನಿಂದಾಗಿ ಹೆಣ್ಣುಮಕ್ಕಳ ಜೀವನ ಮೌಲ್ಯವೆ ದೊಡ್ಡ ಕುಸಿತ ಕಾಣುತ್ತದೆ.

ಕೆಲವು ಪರಿಹಾರಗಳು
ಮೈಗಾದ ಗಾಯ ಮಾಯುವುದು ಸುಲಭ, ಮನಸ್ಸಿಗಾದ ಗಾಯ ಹುಡುಕೋದೇ ಕಷ್ಟ! ಹೀಗಿರುವಾಗ ಹರ್ಟ್ ಆಗದಂತೆ ತಡೆದುಕೊಳ್ಳುವ ಸಾಧ್ಯತೆ ಇದೆಯೇ? ಈ ನಿಟ್ಟಿನ ಪ್ರಯತ್ನವನ್ನಂತೂ ಮಾಡಬಹುದು. ಯಾರಿಗೆಷ್ಟು ಜಾಗ ಕೊಡಬೇಕೋ, ಯಾವ ಸ್ಥಾನ ಕೊಡಬೇಕೋ ಅಷ್ಟನ್ನು ಮಾತ್ರ ಕೊಡುವ ಎಚ್ಚರಿಕೆ ಇರಬೇಕು. ಯಾವುದೇ ಸಂಗತಿಯಾದರೂ ನೀವು ಅವಕಾಶ ಕೊಟ್ಟಾಗ ಮಾತ್ರ ಅದು ನಿಮ್ಮಲ್ಲಿ ಸಂಭವಿಸುತ್ತದೆ. ನಿಮ್ಮ ಪರ್ಸನಾಲಿಟಿಯ ಗೋಡೆಗಳನ್ನು ಸಾಧ್ಯವಾದಷ್ಟು ಗಟ್ಟಿ ಇಟ್ಟುಕೊಳ್ಳಬೇಕು.
ಎಲ್ಲಕ್ಕಿಂತ ಮೊದಲು ನಮ್ಮಲ್ಲಿ ೨೪ X ೭ ಅವೇರ್‌ನೆಸ್ ಇರಬೇಕು. ನಮ್ಮ ಖಾಸಗಿ ವಲಯದೊಳಕ್ಕೆ ಯಾರೂ ಅನಧಿಕೃತವಾಗಿ ಹೊಕ್ಕಿಕೊಳ್ಳದಂತೆ ಎಚ್ಚರ ವಹಿಸಬೇಕು. ಎಳವೆಯಲ್ಲಿದು ಕಷ್ಟ. ಆದರೆ ನಮಗೇನು ಬೇಕು ಎಂದು ಅರಿವಾಗತೊಡಗುವ ಹೊತ್ತಲ್ಲೇ ನಮಗೇನು ಬೇಡ ಅನ್ನುವುದರ ಅರಿವನ್ನೂ ಬೆಳೆಸಿಕೊಳ್ಳುತ್ತ ಬೆಳೆಯಬೇಕು. ಇಲ್ಲಿ ಪ್ರತಿರೋಧ, ಪರಿಹಾರಗಳಿಗಿಂತ ಮುನ್ನೆಚ್ಚರಿಕೆಯೇ ಮಹತ್ವದ್ದು.